Stanley Samuelsen - Ein livandi legenda á palli

Við síni kendu rødd og framúr gittarspæli bjóðar Stanley Samuelsen til eina konsert, sum rakar beint í hjartað. Ein løta við nærveru, søgum og sangum, sum hava fylgt okkum í fleiri ættarlið.

Stanley er ein av svervektarunum innan føroyskan tónleik. Hann er føddur í Fuglafirði, men hevur verið búsitandi í Danmark seinastu 55 árini.

Hann hevur spælt óteljandi konsertir, tulkað Janus Djurhuus og skrivað løg, ið hava sett seg føst í føroysku sálina. Hóast Stanley nú livir við Alzheimers, heldur hann fram at spæla og syngja við somu lívsgleði sum altíð.

- Eg haldi á so leingi eg kann - og so leingi, nakar vil lurta, sigur Stanley.

Í oktober útgav hann nýggja LP og fløgu kallað Sólskin, sum er eftir yrkinini Solskin hjá Williami Heinesen. Og samstundis útgav hann eisini bókina “Stanley”, skrivaða av Hilmari Jan Hansen – ein rørandi frásøgn um tónleikin, lívið og minnini, sum hava myndað hann. Bókin kann keypast á staðnum

Ein konsert við Stanley er meira enn tónleikur. Hon er ein ferð ígjøgnum lívið, við hjarta, nærleika og sangi, sum fær fólk at koma hvørjum øðrum við.